政情：搞搞政：食力簡唔吼iBond揀大笨象
政府推出嘅抗通脹債券iBond今起認購，因為發行量有限，好似「雞肋」咁，食之無味，就連前冠軍練馬師「食力簡」簡炳墀都話唔吼，聲言買俗稱「大笨象」嘅滙豐好過。
尋日馬季煞科，喺馬場見到食力簡，講起iBond時佢就頭擰擰。佢話滙豐每隔幾個月就有息派，好過買iBond多多聲，係咪有助抗通脹，佢話要時間觀察喎！言下之意，擺明覺得iBond「好廢」。提及政府倒行逆施，佢就扯晒火，批評政府「亂搞嘢」，又話：「政府做嘢冇長遠規劃，亂派六千蚊，不如集中資源，搞好醫療同長遠福利好過。」
同場嘅東華總理王賢誌，講起iBond都係擰擰頭，佢仲向政府發炮：「政府派嗰六千蚊我都未收到，仲發iBond問我攞錢？有冇搞錯呀！」
