政情：催唐唐選特首 田少太監上身

全國人大常委范徐麗泰日前話考慮參選特首，引起城中各界熱烈討論特首選舉，但富貴黨榮譽主席田北俊尋日就力撐亦係「鐵三角」之一嘅政務司司長唐唐，話唐唐對商界好熟悉，會支持佢參選。不過依家真係皇帝唔急太監急喇，事關唐唐呢排「玩自閉」，對於選特首嘅事一直冇聲冇氣，照計立法會就快放暑假，佢係時候辭職參選。不過，之前七一有成二十二萬人上街，唐唐作為政策把關人難辭其咎，「上海幫」見形勢不對換范太上場都唔奇，睇嚟唐唐匿埋可能真係有隱衷都唔定。

唐唐冇聲冇氣 范太積極發聲

田少尋日出嚟撐唐唐，話商界較接受唐唐係事實，皆因唐唐對商界好熟悉，仲話「商界對佢當然有好感啦，會支持佢參選特首。」對於范太，田少就話范太做立法會主席時係處事公正，不過商界對范太認識唔多，又指出范太嘅「弱項」︰「佢（范太）自己講對經濟唔熟悉。」

個個對選特首你一言我一語，但係被喻為「鐵三角」之一嘅唐唐反而冇聲冇氣，但一直撐唐唐參選嘅范太連日積極發聲。雖然范太話未有信心參選，亦都未組織參選班底，不過就歡迎其他人對佢嘅能力提出質疑同批評，因為可以令佢反思、了解自己嘅弱點而補救，同埋可以透過學習同聽意見作出改善咁話。范太又暗踩成日評論民生嘅行政會議召集人梁振英，話「講市民鍾意聽嘅說話唔難，關鍵在於如何落實市民嘅願景」，唔好得個講字。

趁熱鬧嘅仲有新民黨主席葉劉淑儀，佢尋日出席活動時就話有市民、街坊叫過佢參選，不過一切都「言之過早」。唔通范太刺激到佢都考慮參選﹖點知佢覷準時機表態︰「我素來都係有志服務香港，我返嚟（香港）五年都係參加選舉啦、從低做起啦、做政策研究啦，所以我係唔需要喺某一個時刻先至開始研究㗎。」明明係衝住范太而嚟，寸爆！