政情：消防打壓救護工會屈屈奇安

新民黨尋日喺新蒲崗采頤花園開新辦事處，今次掛帥嘅係消防處救護員會總幹事屈奇安，積極考慮參選區議會嘅佢係采頤「地頭蟲」，二○○○年高票當選業委會主席，坦言喺度開辦事處服務居民係「別具意義」。辦事處舖位嘅冧把係「生一發」即318，意頭好兼有各方紀律部隊好友撐場，加埋保安局局長李少光畀面到賀，本應高高興興，但救護員會主席陳仕祺忍唔住呻「屈」，話消防處打壓救護員會，「屈屈奇安」！

「可能怕我揭穿剝削」

屈奇安直認佢原本五月以總幹事身份代表救護員會同副處長開會，點知消防處話個會係傾在職屬員嘅福利事宜，屈SIR非現職屬員不宜出席會議，救護員會成班兄弟當然好慶，話消防處粗暴侵犯工會主權，代表應由工會自行委派，涉及原則性問題，即刻去信公務員事務局、紀評、紀總、勞工界立法會議員同身兼新民黨主席嘅議員葉劉淑儀投訴。

屈SIR話退休公務員做工會好多例子，好似梁籌庭同黃河，現分別擔任公務員工會聯合會總幹事同華員會會長，完全冇問題，質疑消防處點解咁大權，唔鍾意邊個就唔畀佢開會，又話：「佢哋可能怕咗我做咗（救護員會）十幾年，太清楚底蘊，怕我揭穿佢哋想剝削救護員權益！」又譏消防處怯懦，「開會係商討問題，如果（消防處）係大大方方公公正正，邊個開會有乜問題？」

救護員會話正等緊公務員事務局局長「D姐」俞宗怡發落，話如果今次先例一開，其他公務員團體亦會受影響，唔排除會向盟會國際公務勞連投訴，理事會會研究進一步抗議行動。公務員事務局回覆查詢時承認，接獲救護員會就派代表出席副處長會的申訴，現正向消防處了解事件嘅詳情。