政情：立會臨煞科緬懷舊大樓
喺嚟緊嘅暑假，立法會就告別有近百年歷史嘅舊立會大樓，搬去添馬艦嘅新大樓。話晒各黨派議員都喺舊大樓噴過唔少口水花，所以決定喺下禮拜三本年度最後一次大會，加插一項「告別立法會大樓」嘅議案。
下禮拜三嘅煞科大會仍有大堆議程，最保守估計都要傾兩日，依家加埋告別舊大樓議案，極可能要傾埋第三日（十五號），睇怕會同原定喺當日下晝舉行嘅特首答問大會撞期。
為免煲呔曾又有藉口迴避質詢，立會最後決定如果到十五號中午仲未完會，就乾脆暫停會議，如期舉行答問大會，等插完煲呔曾之後先再復會。可見班議員係唔會放過插多一次煲呔曾嘅機會，為佢哋喺舊大樓嘅回憶再添一筆。