政情：搞搞政：鬍鬚曾避7．13遠走楓葉國

雖然政府已喺民意壓力同建制派集體倒戈下，被迫跪低押後表決替補機制，但未能撲熄民怨怒火，其中人民力量就發動三千人喺七月十三號，即下禮拜三包圍立法會三日，誓要迫使強推惡法嘅煲呔曾、律政司司長黃仁龍同政制及內地事務局局長林瑞麟下台，到時中區交通隨時再次癱瘓，甚或演變成騷亂。

其實，下禮拜三嘅煞科大會仲有好多極具爭議嘅議題，包括帳委會東亞運混帳醜聞調查報告，議員勢必鬧爆死不悔改嘅民政事務局局長曾德成；仲有由劉慧卿提出，要求引用《立法會（權力及特權）條例》徹查葛輝事件嘅議案，矛頭直指涉嫌政治干預政府招標程序嘅財爺鬍鬚曾。

但鬍鬚曾尋日透過新聞處發稿，宣布下禮拜一至周五出訪「楓葉國」加拿大三個城市，擺明懶理「7．13」包圍立會行動，仲將特權法查葛輝議案交畀「破署」坐正冇耐嘅商務及經濟發展局局長蘇錦樑答辯，認真好帶挈。

泛民尋日事先張揚會喺「7．15」舉行嘅答問大會內外夾擊煲呔曾，但佢嘅「哎吔細佬」鬍鬚曾屆時應該仲喺飛機上面，趕唔切返港撐場。