政情：喜尚送豬形桔Sell招牌菜
踏入七月，新股上市冇停過，尋日就有兩隻「細細粒」新股上市，分別係中式酒樓集團喜尚同印刷線路板生產商依利安達。兩間新上市公司當然都有預備禮物送畀港交所啦，佢哋分別送一對特別嘅桔同一個聚寶盆，睇落都相當傳統同易明，仲夠晒意頭同新年feel添！
細問之下，喜尚送嘅一對豬形嘅桔係有名堂㗎，因為佢哋嘅燒豬出名到拎到米芝蓮，當然送嘅禮物都離唔開豬啦，所以就取其諧音改名叫「諸事大吉」嘞，夠晒好意頭同心思，更加配合埋佢哋嘅招牌菜！你睇喜尚主席黃君武攞住隻豬，望落好似好墜手。
至於依利安達送嘅聚寶盆，佢哋話除咗聚財之外，仲有個寓意係話港交所聚集咗唔少好公司嚟上市，咁講明讚港交所之餘，暗地裏都讚埋自己，果然好有深度喎！
喜尚主席黃君武（中）送一對豬形桔畀港交所。