政情：比亞迪駛入科學園
比亞迪獲股神巴菲特力撐拓展電動車，早已街知巷聞，但真正見過又或者坐過佢哋開發嘅電動車嘅本港股民，相信就唔係太多，不過呢個情況改變緊，比亞迪主席王傳福喺香港公布咗個好消息，公司會喺香港科學園成立研發中心，為比亞迪電動車駛入香港市場揭開序幕。
比亞迪將電動車引入香港市場已部署咗一段時間，據王傳福講，決定去科學園設立科研中心，係配合集團喺右軚版本電動車嘅發展，仲想透過香港打入國際市場。咁香港幾時有？佢話下半年會先喺香港推出幾十架電動車，等研發中心正式運作後，仲會有更多車款登場，當中將包括電動巴士同的士。
投資者近期好關心比亞迪嘅銷售情況唔多好，王傳福尋日解釋，內地汽車補貼喺上半年完結，無可避免會對內地車市帶嚟打擊，佢相信下半年汽車銷售會回升。
王傳福