政情：鼠王芬潛水網民圍捕

政府喺替補惡法趴街，造就有「鼠王芬」之稱嘅專業會議立法會議員梁美芬成為當晚香港互聯網大紅人，但自從鼠王芬早幾日因為派發疑似「成功爭取押後遞補機制」嘅傳單而爆紅後，呢幾日突然一改過往嘅高調作風，收埋自己唔肯見人。

話說立法會尋日開內會同財會，一向出席率唔差嘅鼠王芬，竟然繼禮拜三「龜縮」，拒絕面對傳媒、禮拜四拋低「親生仔」，缺席「大舜政策研究中心」傳媒聚會之後，再次潛水，實在不禁令人擔心，到底佢因乜要避呢？但無論點避都好，相信都唔拖得好耐，因為佢嘅對頭人—人民力量嘅黃毓民尋日謔稱，立法會好多男議員都勁掛住佢，所以徇眾要求，發起「尋找失去的鼠芬」運動喎。

「大舜係大禹daddy」被翻炒

毓民對呢個「運動」有幾認真同上心只有佢至知，但相信鼠王芬都唔會介意嘅，反正佢應該好明白，政壇根本就係個一沉百踩嘅地方嘛。不過，喺鼠王芬呢件事上面睇到，原來人衰真係行路會打倒褪，有網友尋日重提舊事，將佢今年五月誤稱三王五帝時期「大舜係大禹daddy」呢件軼事拎出嚟講，大事揶揄一番，仲不斷喺社交網站facebook上面熱傳添。

另外，「我相信有10萬人不想梁美芬再當選議員」群組尋日已經去到有近二萬四千人，有網民質疑有五毛黨亂開群組分散參加人數，呼籲大家千萬唔好中計，一定要繼續谷高個人數，如果真係唔覺意突破到十萬之數，相信會對鼠王芬構成一定壓力咁話。呢種變相係網上「捉鼠」運動啦！

事情發展至此，匿埋唔係上策，尤其作為一個政治人物，鼠王芬有必要向公眾清晰交代，否則風波只會繼續升溫，之後咪仲難收科！