離婚要傾四大問題
【本報訊】鋒芝婚變，有傳兩子Lucas和Quintus將被帶去泰國，黃國桐律師指出：「小朋友如有獨立證件，唔一定要跟父母出入境，但如果父母正準備搞離婚，帶小朋友出國前最好事先得到另一方同意，以免搞到要出禁制令！」
對於鋒芝昨晚單獨見面，黃指出：「佢哋要傾四大問題：第一是離婚理由，是否雙方協議，如果係，咁就一齊申請，大約三個月至半年完成。第二是撫養權，佢哋要為兩個仔做計劃，供書教學和照顧嘅安排，如果計劃不合情理，就要由個官判。第三點是贍養費，除咗每個月嘅贍養費數目，亦有機會談及會否有一筆錢用嚟安頓三母子。最後一點則是如何分配共同擁有的物業或物件。」
黃國桐又稱：「婚姻出現問題嘅夫婦單對單見面係好事，可以深入傾清楚雙方嘅問題，再見亦係緣分，好多時咁樣見面後會有彎轉。」
三名律師於昨日下午五時抵達霆鋒銅鑼灣公司。