政情:搞搞政:康叔睇死政府一嘈就改

特區政府喺替補機制上大敗,政府管治威信簡直弱過藥煲,但一個禮拜前,政府成班高官仲抱住僥倖心態想博懵衝關,當時前港區人大代表吳康民出席電台預先錄製嘅節目時,已經批死政府「啲嘢一嘈就改」,話口未完,政府就即刻奉上真實案例,康叔果然睇通世事!

康叔喺呢個節目中話︰「依家政府最大嘅毛病就係優柔寡斷,啲嘢一嘈就改,改咗又唔一定好。」佢當時講緊嘅係政府將預算案中建議注資強積金改為派發六千元,不過,佢對高官嘅斷症卻好準。康叔仲話,有人話哀莫大於心死,佢就覺得「哀莫大於腦死」,為免自己出現腦功能退化,佢日日都睇書讀報,保持頭腦靈活。

講完時事後,康叔仲透露,出席演講時講稿一定唔會假手於人,佢話︰「人哋寫都唔知講乜,讀起嚟唔順。」啲高官周不時照稿讀,結果食螺絲、甩甩咳咳,好心佢哋跟康叔學吓嘢喇!

「Money18免費即秒股票報價網站」現推出8升級功能,財經資訊,實時實發!