政情:沈祖堯賀中大生品酒奪獎

中文大學舊年成立咗個品酒學會,學會三位學生早前遠赴法國波爾多參加「葡萄20」品嘗競賽(20 sur vin),一戰即捷,學會力壓有超過二百年歷史嘅劍橋大學品酒學會及一眾歐美大學生,喺賽事中奪得亞軍,僅以一分之微敗給哈佛大學商學院研究生。尋日學會搞咗祝捷酒會,中大校長沈祖堯都親身到場打氣,仲同學生飲番杯。

沈祖堯同三位得獎學生巢景峰、劉敏珊及丘家兆摸住酒杯底交談,佢讚揚得獎同學表現出色,雖然佢哋酒齡尚淺,但卻能在短短嘅備戰時間內熟讀品酒專業知識。今次品酒比賽中,三人獲頒兩支九九年Lafite Rothschild佳釀獎品,但尋日佢哋就冇開到呢兩支酒,只係開咗支普通嘢請校長飲,唔知佢哋會點處理呢兩支佳釀呢?

「Money18免費即秒股票報價網站」現推出8升級功能,財經資訊,實時實發!

沈祖堯(右二)及中大校董陸耀文(中),與得獎學生巢景峰(左二)、劉敏珊(左一)及丘家兆(右一)舉杯慶祝。 (中大提供)