政情：答問會走唔甩 煲呔曾等受靶

政府喺替補機制上一再跪低，曾蔭權管治班子既冇虛心接納民意嘅胸襟，又冇審時度勢嘅能力，最後搞到一退再退，真係乜嘢架都丟晒。作為始作俑者嘅煲呔曾原定下個禮拜五（十五號）出席立法會行政長官答問大會，但佢早前以立法會議程太繁重為由將答問大會押後到下個立法年度先舉行，圖避過七．一遊行至今嘅滔天民憤，不過，人算不如天算，政府最終又喺替補機制上跪低，結果煲呔曾亦要死死氣落立法會受靶。

政府原定十三號強闖立法會，將《2011年立法會（修訂）條例草案》恢復二讀，但泛民議員要玩拉布，所以煲呔曾上個禮拜「好體貼」咁諮詢立法會主席，話十三號嘅會可能到十五號，建議將本立法年度最後一次答問大會押後到下年度。

呢個改變對煲呔曾嚟講真係有百利而無一害，事關七．一有廿幾萬人上街，佢落去立法會，實畀議員轟到體無完膚，咪i爆頭搵藉口縮沙，弊在替補機制草案實在太粗疏，政府跪低原定十三號攞上立法會嘅時間表都作廢喇，煲呔曾整定偷雞唔到蝕把米。

譚耀宗暗寸玩完

講開冇碇匿，尋日建仔十九周年會慶酒會，煲呔曾到場主禮，建仔主席譚耀宗致辭時話，尋日係煲呔曾第六次以特首身份出席佢哋會慶酒會，好有可能係最後一次，除非建仔將明年嘅酒會日期提前喎，呢番說話即時惹來在場嘉賓一陣騷動。煲呔曾就一路聽一路臉黑黑兼O晒嘴，啱啱舉行嘅七．一遊行咁多人叫佢落台，佢一於厚面皮當聽唔到，今次當面畀人篤中死穴，實在無所遁形！

講開建仔，佢哋南區支部近日開班教市民自製「橡皮圖章」，結果被網民寸爆佢哋做「橡皮圖章」認第二，冇人敢認第一，講到鬥面懵，佢哋同煲呔曾都有得揮！