SUN世代：鑽戒定情創商機

結婚是人生大事，更為黎子斌（Alex）帶來生命中最重大的轉變。三年前，Alex為了向女友求婚，到處搜尋鑽石戒指，但打工仔budget有限，遂轉而向外國網站訂購，卻讓他發現，在網上購買鑽石，比在名店選購便宜一大截，從而引發創業念頭，更不惜放棄會計師高薪厚職，開創了全港首個鑽石銷售網站。

Alex是鑽石銷售網站「Hong Kong I-Diamond」創辦人，他的創業故事，可說由一條紅線牽動，「○八年初想向拍拖三年嘅女朋友（現為太太）求婚，決定買一隻一卡鑽戒，半年前我已經上網做定功課，睇咗好多資料。」

當時Alex在「Big4」之一的羅兵咸永道會計師事務所任職，身為會計師，購物也很精打細算，留意到坊間名店出售的鑽飾價格昂貴，遂轉而上網尋找樓上舖。「我自己都係打工仔，budget唔係咁鬆動，樓上舖雖然平過街舖，但佢哋唔會喺網上列明價格，要客人親身上門，唔夠user-friendly。」

金融海嘯激發創業心

後來他發現在美國網站訂購，有齊明碼實價，比樓上舖更便宜。當他決定「扑錘」之際，同事又替他「搭上搭」，介紹了一位鑽石批發商給他，「原來向批發商買最平，比街舖差唔多平一半！」

當時正值金融海嘯，會計工作大減，他湧起創業念頭：「無論經濟幾差，婚都係要結嘅，我都想喺有限嘅預算下，買到最好嘅戒指，其他人應該都係咁諗，點解唔試吓自己創業？」

當時香港沒有同類網站，他決定博一鋪：「做網站唔使畀舖租，批發商又肯提供貨源，覺得有得做。」Alex更為此特地修讀GIA鑽石鑑證課程。就是這樣，全香港首個鑽石銷售網站，在○九年初正式運作。

親陪驗證顧客有信心

「好記得網站開咗第二日，就有客人幫我買咗隻九十份E色戒指，出面賣五萬幾蚊，我賣三萬蚊，好快就成交！」為加強顧客信心，Alex首創親身陪同顧客到GIA驗證鑽石的服務。「我賣嘅鑽石全部有GIA證書，但網站係新興銷售渠道，而買鑽石又唔係一筆細嘅數目，只要客人要求到，我就會陪佢去驗，亦可以建立口碑。」

當時他還沒想過全職做生意，直到○九年九月與女友結婚，公司派他到北京工作，他不想與太太分隔異地，與太太商量後，決定瞓身創業。「當時我諗，只係兼職性質，一個月都搵到我半個月人工，如果全職去做，豈不是更加不得了？」

Alex的網站生意現已上軌道，台灣更設有分公司，內地亦有合作夥伴，每年營業額達一千五百萬元。「能夠識到我太太，到出嚟做生意，我覺得自己好幸運，我會繼續努力，希望將來推出自己嘅鑽飾系列，將業務發展得更有規模！」

黎子斌小檔案

現職：Hong Kong I-Diamond Co. Ltd.主席

學歷：香港理工大學會計系學士，GIA鑽石鑑證文憑

專業：註冊會計師

興趣：踢波、打乒乓波、打羽毛球、旅行