政情：李小加樂見改革有爭議

港交所行政總裁李小加上任後推出一連串新動作，包括明年落實第二階段延長港股交易時間、增設期指夜市、重提收市競價時段等具爭議性嘅改革建議，令到啲港資經紀非常不滿，但小加總裁話香港就係一個可以表達唔同意見嘅地方，有爭議唔緊要，有爭議至證明佢有做嘢，仲好歡迎市場繼續討論。

小加總裁提出過好多改革方案，但業界似乎唔多like，港資經紀更認為改革措施愈嚟愈向外資大行傾斜。小加就話好歡迎同業界一齊討論同改進，而佢亦唔係一個剛愎自用同一意孤行嘅人，更加唔會盲目追求，不過就唔會一遇到反對聲音就退縮。

佢話一直有聽取各界意見，依家耐唔耐會同業界食吓飯，傾吓佢哋嘅問題，仲話再食嘅話，肚腩都會凸出嚟添！

另外，對於上半年香港失守全球新股集資額最多嘅第一名，小加總裁就話冇可能永遠做第一，排到第一或第二都叫唔錯啦。