政情：張建東籲樂觀抗癌魔
防癌會日前舉行籌款晚宴，患過急性血癌嘅行政會議成員、機場管理局主席Marvin張建東一家三口現身撐場。防癌會主席高永文醫生都放下接受過腦下垂瘤手術病人嘅身份，為晚宴出錢又出力。Marvin話癌魔唔可怕，現今醫學日新月異，得病也要「live in hope」（活在盼望中）。
籌款晚宴以「仲夏戀曲動人夜」為題，邀得世界著名男高音大唱藝術歌。晚宴高潮係慈善競投，太子珠寶鐘錶主席鄧鉅明捐出鑽石名錶作拍賣，由民政事務局前常秘李麗娟以十九萬八千元投得。
高永文當晚仲收到一張大支票，大慈善家譚正以譚雅士杜佩珍慈善基金名義，捐五百萬元畀防癌會。高永文感動到眼濕濕，慨嘆唔少癌症病人冇錢醫病，一分一毫都係救命錢。
