政情：搞搞政：周一鑊巡幼園做騷抗疫

奪命猩紅熱肆虐，呢幾個月累積個案差唔多有七百宗，仲有兩個小朋友死咗。食物及衞生局局長周一鑊到依家只係不斷講猩紅熱高峰期會持續，但政府有乜嘢辦法控制疫情就冇乜點講。尋日佢同衞生防護中心總監曾浩輝特登落去中環一間幼稚園了解學校防疫措施，周一鑊頭岳岳睇咗一陣，都唔知對整個防疫工作有乜幫助。猩紅熱殺咗兩個小朋友先嚟懶關心，佢會唔會愛得太遲呢？

奪命病菌同病毒年年襲港，腸病毒、流感搞到香港小朋友同家長驚餐死，如果冇記錯，周一鑊喺咁多次爆疫都冇乜去幼稚園或小學「探班」，佢尋日破天荒訪問聖公會幼稚園（中環校），了解該校因應猩紅熱所做嘅預防措施，大半個鐘訪問裏面，佢睇吓班小朋友喺操場玩遊戲，然後走入課室打個圈，跟住同傳媒匯報猩紅熱概況。呢個官式拜會象徵意義勝於一切，根本係做騷咁做，佢不如好好同班下屬諗吓遲啲暑假猩紅熱繼續爆，政府有乜具體嘢做好過啦！