政情：死撐招辱建制派鬥快轉軚

喺七一遊行後，近幾日各建制派議員立場開始動搖，其中旅遊界謝偉俊第一個走出嚟，講到明唔做公眾諮詢就冇得傾，之後到新民黨主席葉劉淑儀，禮拜日突然約咗幾個獨立功能組別議員出嚟傾吓下一步點走，結果傾完出嚟亦係對外宣稱要做諮詢，仲建議政府押後咁話。富貴黨具體提出修訂建議，列明若果立法會議席係真正出缺而非因議員玩嘢，需進行補選。

經濟動力四個議員一向都最親政府，但發起人之一林健鋒，尋日喺夕陽政府趴街之前，竟然開口質問政制及內地事務局局長林公公點解唔做諮詢，認真係世界變囉。總之都係富貴黨立法會議員方剛講得好，政府嘅做法簡直係累死成班建制派。

建制派走吓一個、走吓又一個，結果得番根正苗紅嘅建仔同工聯會苦苦支撐，依家夕陽政府主動押後二讀，對呢兩個政團嚟講未嘗唔係好事，只係若果喺立法會十月復會後，政府繼續恢復二讀，佢哋喺區議會選舉選情隨時大受影響。講到底，幫煲呔曾政府實在係有辱無榮嘅工作，一眾建制派不如為自己着想，放棄夕陽政府，好過搞到自己樣衰衰吖！