政情：唐唐做炮灰攬住林公公受靶

七一有近二十二萬人上街聲討政府，當中包括反對替補機制惡法。煲呔曾龜縮咗七十二小時後，尋日話暫時押後二讀，先做兩個月假諮詢咁話。之但係出嚟宣布政府趴街嘅，竟然唔係一直推銷惡法嘅政制及內地事務局局長「林公公」林瑞麟，而係一路冇影嘅政務司司長唐唐，一於推佢出嚟做炮灰，一齊趴街。

疑似特首候選人之一嘅唐唐一向甚少被安排出嚟認衰或受靶，頂多都係好似上次前西九總裁謝卓飛突然辭職咁，出嚟解吓畫就當交代咗。不過近來佢認真運滯，好似關愛基金派錢畀新移民咁，種種安排已經令到身為關愛基金最高負責人嘅唐唐畀人插到體無完膚。

去到公立醫院限制內地孕婦來港生仔喇喎，其實都係關唐唐事，事關佢亦係香港主管人口政策嘅問責官員，你話嘞，佢係唔係事事碰壁，諸事不順先？以為已經雨過天青啦，sorry喎，正正因為佢上司煲呔曾唔肯面對群眾，事事龜縮，結果搞到佢被迫頂硬上，尋日要出嚟向公眾宣布局部褪軚，睇佢宣布時面有難色，嘴角暗帶不忿，就知佢今次實在係不情不願咁焗住上。

跟住煲呔曾冇運行

之前已經講過，喺替補機制呢單鬧劇，一直都係由林公公做主力，唐唐一直都冇沾手，只不過建制派喺七一遊行之後，竟然全面急轉彎，要求見比「林公公更話得事」嘅人，結果就拖咗一向以為「事不關己，己不勞心」嘅唐唐落水，真係不得不再講一次，是禍確實係避不過㗎！

喺呢個夕陽政府打工，理應有心理準備會不斷中箭，唐唐跟住既唔肯面對失敗、又唔肯承擔政治責任嘅上司煲呔曾，點會有運行吖！