政情：搞搞政：肥仔張變立會為食總司令

嚟緊嘅暑假，立法會新大樓就入伙，但到依家仲未搵到有人肯為佢哋提供飲食，立法會行政管理委員會早前開會急謀出路，將來冇飯開點算？

唉！咁近城隍廟都唔識得求番支好籤，唔識得搵「為食總司令」幫手。乜水？咪就係飲食界代表「肥仔張」張宇人囉！好彩肥仔張都醒水，向行管會話業界好少會落標，鍾意面談同埋被邀請多啲，畀肥仔張提點後，行管會即時叮一聲醒咗，拿拿臨物色咗五間飲食集團。

其實立法會新大樓飯堂招標都搞咗好耐，因為之前佢哋要求多多，搞到幾乎無人問津，最終班食慣好嘢嘅議員都要「跪低」，將條件放寬，早輪終於有一間肯入標，但啲質素呢……食到佢哋個個嘅嘴都歪埋咁滯。依家佢哋主動出擊搵咗五間，希望有人肯制喇！話時話，好多尊貴嘅議員都食慣好嘢，出名嘴刁識食，今次揀呢五間怕唔會係啲乜嘢名人食店、富豪飯堂啩？！