政情：奚國華調職揭大挪移序幕
內地三大電訊公司高層變動嘅傳聞，近排雖然被三大電訊商否認，但掌管內地官場人事嘅中央組織部尋日就宣布，工信部副部長奚國華將會出任中移母公司中移集團嘅黨組書記兼副董事長，雖然變動暫不涉及本港上市中移董事成員嘅變動，而王建宙仍然擔任董事長職務，但一般相信今次任命係為王建宙嘅退休鋪路，同時更可能係內地三大電訊商管理層再一次「大挪移」嘅序幕！
奚國華今次嘅調職同之前傳聞主要分別，就係佢只獲委為中移集團嘅副董事長，但由於佢所接掌嘅黨組書記職務，原本由王建宙兼任，再加上已經六十二歲嘅王建宙早已屆退休之齡，所以一般都相信奚國華加入中移董事會以至繼任中移嘅舵手只係時間問題。