政情：政府跪低成性建仔跣到怕

夕陽政府接二連三強推不得人心嘅政策，跪低成性，跣到建制派攤攤腰。據聞，喺立法會擁有最多議席嘅建仔，最近都有啲年輕成員覺得社會氣氛唔係好妥，開始為畀社會鬧爆嘅替補機制提早展開激辯，避免畀夕陽政府唔聲唔聲跣咗一鑊都唔知乜嘢事。

有建仔中人認為佢哋依家嘅形式好被動，一方面睇到好多建制派同道中人嘅投票意向一時一樣，極為飄忽，另一方面其他建制派又毫無戰意，完全隱形唔派人上陣同泛民主派駁火鬥講，有人仲提早為未來把脈，講明下一個同夕陽政府嘅戰場，分分鐘要同啱啱破「署」坐正做商務及經濟發展局局長嘅蘇錦樑過招，因為佢孭飛嘅《競爭條例草案》依家畀商界鬧到飛起，建仔對政府依家提出嘅草案內容亦唔係完全收貨，到時建仔會唔會係兩面不是人，出現「撐又唔係，唔撐又唔係」嘅尷尬情況。

夕陽政府成日畀人逼埋牆角就跪低要佢哋執手尾，有建制派中人忍唔住同政府講到明，第時數夠票先叫佢哋支持，否則擔心佢哋嘅支持只會成為政治代價嘅墳墓喎！