政情：搞搞政：蘇錦樑破署 大舊「贈興」
破「署」坐正嘅蘇錦樑尋日首次以商務及經濟發展局局長身份出席立法會例會，但成個會竟然冇議員恭喜佢，仲搞到要畀議員鬧添！話說政府遲遲未有時間表落實數碼廣播，議員「大舊」陳偉業就問遲啲有數碼廣播時會唔會為啲長者、唔同宗教信眾、弱勢社群等設立獨立電台、電視台，幾時先可以好似外國咁喺電視節目設手語服務。蘇錦樑就話港台已就設立唔同內容嘅頻道進行研究，年底做諮詢時就會公布，但係就冇答到手語服務嘅問題，淨係講咗句「冇補充」。
大舊隨即怒罵︰「手語係好基本嘅服務，可唔可以返去研究吓？你一句冇補充就算數，你依家坐正局長喇喎，唔係無恥到手語呢樣都唔諗吓嘛？」畀人鬧無恥仲面不改容，可能呢啲係做局長嘅基本功。
