慎防搵笨天台屋　杜絕樓市祈福黨

地產霸權，千秋長存！呢頭港府出口術話復建居屋，樓市啱啱先至話叫做稍為降溫之嘛，嗰頭另一個新興市場又嘭嘭聲冒起嘞，大量新盤湧現，呢批樓市新力軍就係市區「頂級」蝸居天台屋！

咦，咪住先，天台屋係僭建物嚟喎，港府又話展開取締行動，點解反而賣到成行成市？唔通早排大量權貴被揭發係天台玻璃屋粉絲，所以市民有樣學樣，以行動爭取享有風涼水冷天台屋嘅權利？定係半桶水政府搞新界僭建村屋半特赦，令市民誤以為市區天台屋都會有特赦呀？統統都唔係，係失德業主同地產代理趕搭尾班車掠水就真。

事情係咁嘅，部分舊樓業主最近陸續收到屋宇署嘅最後通牒，表明下個月採取清拆天台屋行動。於是乎，有見錢開眼嘅業主就想賺盡最後一杯羹嘞，夾埋地產代理搵人笨，將天台屋裝扮成為土瓜灣同深水埗等舊區嘅特色筍盤。

違例天台屋係點樣變成罕有筍盤嘅呢？本報記者佯裝顧客去見識過。地產女代理向記者誠意推介一間兩房一廳天台屋，喺佢口中，呢間天台屋唔止擁有獨立廚廁水電，仲有三大尊享優惠：第一，明刀明槍係僭建，連律師費都慳番，手續快靚正。第二，擔保業權無問題，唔會殺出第二個業主話間屋係佢嘅。呢樣太一叮信呀，間屋僭建㗎嘛，係邊個一手一腳搞出嚟嘅應該好清晰。第三，呢樣吸引咯，政府第日嚟拆屋，即可樓換樓，獲編排入住公屋。

嘩，咁吸引嘅條件，五萬銀有交易，學代理姐姐話齋，水費電費仲可以享受政府資助添，簡直係無殼蝸牛嘅上車恩物啦！

嗱嗱嗱，邊有咁大隻蛤乸隨街跳吖！無錯，天台屋被拆，業主係有機會加快上樓，之不過咁，仲有好多附帶條件，例如符合公屋申請資格等。地產代理為咗促成生意賺佣，講啲唔講啲，正如法律界人士話齋，已經違反專業操守，甚至涉及詐騙成分。

明明知道天台屋就快被取締，仲要游說人去買，咁即係搵人笨。立法會議員就講得啱嘞，港府唔可以坐視不理，應該盡快向天台屋居民或業主登記資料，杜絕有人借租售天台屋圖利，遏止呢種樓市祈福黨行為，否則當局就係製造「迫遷戶」嘅幫兇！

話時話，違例僭建嘅天台屋一樣有價有市，正正反映港府房屋政策係幾咁失敗，而香港樓市又係幾咁扭曲畸形。香港人但求一瓦遮頭，棺材房、劏房、天台屋或者可以暫且忍受，但係咁無能嘅政府，相信好多人真係忍無可忍，叮！