SUN世代:壽險精英永不停步

用「永不停步」來形容羅家遠最貼切不過,他加入保險界十多年,現在不僅是成功的保險經紀,更是帶領下屬不斷向前的好上司。但他沒有自滿,反而提醒自己要每天進步,工作之餘不忘回饋社會,瞓身參與社會事務,用快樂感染身邊每個人,為世界增添正能量。

四十歲的羅家遠(Franki)是宏利人壽保險分行經理,他二十五歲加入保險業,但最初並無甚麼抱負,「我當時只係讀到中學畢業,做保險淨係想搵錢,但入行後,就慢慢明白保險嘅重要。」

令他感受最深的一件事,發生於入行第四年,「有一個由細識到大嘅好朋友,佢係新界原居民,屋企有屋有地,生活無憂。佢幫我買咗份一百五十萬元嘅保單,當係幫吓我呢個老友囉,點知佢大使慣,欠下五百萬街數,喺年初三嗰日燒炭自殺!」

六度獲美百萬圓桌會籍

好友遺下孤寡,哭着打電話向他求助,「佢係我唯一一個death claim!嗰一刻終於感到,一份保單對一個家庭係好重要,亦令我永遠記住,賣保單唔止係做成一單生意,更重要係幫到一個家庭!」

另一樁難忘事,是為一個的士司機買保險。「佢一家四口住秀茂坪徙置區,叫我去佢屋企樓下個垃圾站旁邊傾,第一次遇到客人約我去垃圾站!最後佢幫我買咗張三百蚊嘅保單。銀碼唔大,但我覺得呢張單好重要,因為呢筆錢,已經係客人能力所能負擔嘅。」

勤懇拚搏的Franki,在九九至○七年間,六度榮獲「美國百萬圓桌會籍」(MDRT),這是全球保險業界的最高榮譽,只有最頂尖的百分之五保險從業員才能得此殊榮。「百足咁多爪」的他,又曾投資多項生意,如此多瓣數,只因他深信永不停步,才是成功關鍵。

積極向上要求日日進步

「做咗呢行咁多年,見盡好多人嘅去留,後來覺得,一個人能否成功,最重要係有冇passion!」他謙稱自己未算成功,故要求自己每天都要進步,「例如今日業績比昨日好少少,咁已經係進步,只要有heart就會做到,我都係咁要求下屬,希望佢哋有團火、積極向上!」

Franki將這團火延續到社會事務上,加入菁英會、國際青年商會及九龍青年商會,並擔任要職,積極推動會務,曾統籌過博鰲論壇及多項青少年活動。「參與社會事務,自己都學識好多嘢,有好大滿足感!」最難忘是○八年擔任九龍青年商會會長,短短一年,令會員人數倍增,更因而榮膺國際青年商會最傑出分會會長。他已訂下目標,投放更多時間服務社會,「一個人幾叻,都唔可以改變整個社會,但如果多啲人一齊出力,香港一定會更好。我希望感染更多朋友,一齊回饋社會!」

Franki's Profile

學   歷:菲律賓比立勤國立大學工商管理碩士

公職(部分):香港菁英會社會民生研究會副秘書長兼工商研究會委員、國際青年商會香港總會參議員、九龍青年商會2008年度會長、河北省青年聯會第十屆港邀委員

興   趣:跆拳道、集郵、桌球、籃球

「Money18免費即秒股票報價網站」現推出8升級功能,財經資訊,實時實發!

李嘉怡

Franki曾六度榮獲「美國百萬圓桌會籍」獎狀。

身為菁英會一員,Franki(前右二)對該會舉辦的博鰲論壇,自是出力參與。

Franki(前排中)出席國際青年商會活動。(受訪者提供)