政情：陳燭光練拉丁捱病傷腳
已故著名教育家陳樹渠嘅女兒陳燭光，前晚同佢嘅拉丁舞老師Simon現身晚宴，佢話雖然一直有興趣學拉丁舞，但直至舊年九月至開始學，而喺早前為預備公開表演期間，曾感冒發燒同整傷腳。自言將參加拉丁舞比賽嘅佢話：「跳拉丁舞如果唔參加比賽，只係練習嘅話會好悶，去比賽先至有新鮮感，依家每個禮拜都要練六個鐘。」跳舞會唔會令佢瘦咗？佢話：「唔會，因為壓力大反而肥咗。我建議初學者可以先跳Jazz或Hip Hop，令筋骨軟啲，先再學跳拉丁。」舞蹈師Simon讚陳燭光跳得唔錯，又話：「我有成日叫佢練，佢仲話我鬧佢！」
