政情：陳君宜搞多元時裝網店

玩具城董事鄭躬明太太Qinnie陳君宜，本來喺中環開時裝店，仲曾經話有意開分店擴充生意，點知分店未開，總店就結束營業，依家轉營搞時裝網站www.zeuz.com.hk。Qinnie話：「老公初時教我，話一係唔搞，係搞就發大嚟搞，開初仲提議我開十幾間分店，但係舖租真係太貴，根本冇可能開咁多間，好難回本。不過，我覺得網上商店有潛力，雖然喺香港未成氣候，但我認為有得做，所以將成盤生意變為網上商店，專入歐洲、日本時裝。」

Qinnie話以前只係請兩個職員打理時裝店，但依家轉營後，就租咗個studio office同聘請超過十個員工。原來佢想將網頁搞到好似時裝雜誌，除咗請時裝編輯撰寫潮流資訊外，仲邀得徐子淇御用化妝師Gary Chung撰文，同埋售賣Gary嘅護膚產品。佢話：「個網頁除咗賣衫，每個禮拜都會更新潮流時裝資訊，仲請咗個形象設計師解答讀者扮靚襯衫嘅疑難問題，個office有埋studio，一有新衫就有模特兒示範。」