政情：麥鴻崧蒲頭凶多吉少

早排搞到滿城風雨嘅「上網學習支援計劃」終於要見人喇！自前政府資訊科技總監葛輝行出嚟，指控財爺鬍鬚曾喺呢個計劃籌備初期已經欽點某個機構中標後，識得呢個計劃嘅市民真係多咗好多，個個都放長雙眼睇呢個計劃最終搞成點，雖然政府極度唔願意，但今日資訊科技總監麥鴻崧仍要開簡報會交代一下。

葛輝其中一個指控，係話政府唔知點解一意孤行，係都要搞個分區執行方案出嚟，將計劃交畀兩間唔同機構，分別喺唔同區執行同一項計劃。今日呢兩個無啦啦畀人扯埋一齊嘅機構都會派代表見傳媒，話就話係講工作進展啫，但係人都估到焦點喺邊啦。

立法會已先後兩次否決咗動用權力及特權條例去處理呢單嘢，葛輝又唔能夠提出更多有力證據指控夕陽政府，件事基本上已不了了之，所以班傳媒都會金睛火眼睇實兩個機構，若果到時真係有乜差池，相信一定走唔出市民嘅法眼，麥鴻崧都唔會好受。