政情:「爆冷」光榮退役四太不捨
賭王名駒「爆冷」曾多次揚威國際賽事,喺六月八號宣告退役。主人四太梁安琪尋日聯同一班馬會高層,喺沙田馬場為「爆冷」開歡送party,「爆冷」現身亮相圈,繞場一周同馬迷say goodbye,四太依依不捨,影相一刻目不轉睛咁望住「爆冷」,難捨難離。四太坦言「爆冷」每次奪標,全家上下都開心到震,佢亦自覺同「爆冷」好有緣。
「爆冷」退役後先入住上水雙魚河騎術學校休息一年,適應後再移居新西蘭或者澳洲。賭王尋日冇入場,但亦唔捨得「爆冷」,曾經諗住入場望多佢兩眼,但最後怕勞師動眾,放棄入場。
騎師白德民最後一次策騎「爆冷」巡行亮相圈,向馬迷道別。 (馬會提供)
四太(左二)同超盈(左一向馬會主席施文信(右二)送上「爆冷」嘅馬蹄鐵以示紀念。