政情：大劉旗下座駕連切兩線熱爆網
近日網上流傳一段驚險片段，有一部車牌「C00L」嘅淺藍色七人車連切兩線，仲嚇到一部巴士要突然煞車添！
呢段片喺上禮拜六畀人上載去YouTube，片段開始時，地點應該係灣仔告士打道東行線，車牌「C00L」嘅淺藍色七人車原來喺左邊線行車，之後突然連切兩條線，由左切到右，拍到呢段片嘅車就咁啱喺中間線，當「C00L」由左邊切埋嚟時，呢部車即時煞車，連帶最右線嘅巴士同樣要被迫煞車，幾部車相距好近，好彩冇意外發生。
我哋查過資料，呢部「C00L」由新榮利有限公司登記，而地產商華人置業有限公司就持有呢間公司，據報華人置業主席劉鑾雄個紅顏知己呂麗君常用呢部車，至於究竟當時部車有乜人，咁就真係不得而知嘞。
網上熱傳「C00L」車牌七人車連切兩條線，嚇到巴士都要煞車嘅短片。