政情：周一鑊同CY摑來摑去

日前政府出手限制內地孕婦來港產子，食物及衞生局局長周一鑊緊跟政府立場，仲講到明政策目標係以享用產科服務嘅人國籍為準，即係話港人內地孕婦都會受到影響。呢項政策啱唔啱，到咗今日仲係有好多爭議，好似行政會議召集人CY梁振英話政府應該為港人內地懷孕妻子提供特別安排，但周一鑊尋日就繼續堅持「No Way」，明摑自己同僚一巴。

周一鑊尋日解釋，話自己尊重CY嘅個人意見，但政府已深思熟慮過，仲批評自己同僚嘅講法偏離政策原則咁話。呢個政府真奇怪，限制內地孕婦來港產子呢項咁重要兼影響人口政策嘅措施，理應喺行政會議充分討論過至係，今次行會成員喺政策公布翌日就唱反調，唔通喺開會過程中搞到好唔愉快？

當然，每次班行會成員行出嚟提出同政府相反嘅意見，都會聲稱係個人立場呀、唔會同政府政策或者行政會議規定有牴觸咁，之但係一而再、再而三出現呢種情況，確實難免令人懷疑夕陽政府嘅行會已經淪為吹水會或已退化成一盤散沙。