政情：新民黨倡設兩超級局長

夕陽政府等收工，完全冇長遠眼光同規劃。新民黨睇唔過眼，認為下一屆政府嘅架構要大執，建議增設兩個職責等同司長嘅局長，負責人力發展同經濟發展，希望有人可以諗吓較為長遠嘅問題，而唔係日日喺度救火。

新民黨主席葉劉淑儀同兩位副主席田北辰、史泰祖尋日開記者會，話現時煲呔曾政府嘅架構，已經係上世紀七十年代嘅古董，不合時宜，有需要重組。佢哋建議增設兩個屬首長級第九級嘅局長，由人力發展局局長統籌教育局同勞工福利局，由經濟發展局局長統籌商務及經濟發展局、創新及科技局，另外要設立四個委員會，喺幾個重要範疇提出長遠規劃。

一個政府，要兼顧嘅嘢咁多，職責搓圓撳扁都唔會消失咗，分工太仔細，好容易變得架床疊屋。今次葉劉將政務司司長同財爺兩個位「削權」，難免惹嚟猜測，呢個唔通係佢未來一旦執政嘅政府架構圖？佢就話呢次建議不涉個人因素，係咪要問鼎特首亦係言之尚早。