政情：郭寶賢突冒起或搶怪醫議席

距離二○一二年立法會換屆改選仲有年幾時間，因為地區直選增加咗五席，又新增咗五個「超級區議會」議席，各政黨都吼實呢啲新議席，圖拓大政治版圖。咪以為呢兩個戰場至有惡鬥，功能組別亦不遑多讓，繼工程界外，醫學界嘅選情都有暗湧。

相信大家仲記得，「怪醫」梁家騮○八年喺醫學界選舉中勝出後一臉錯愕，事後有人形容選舉結果寫咗喺怪醫面上，因為包括佢在內都估唔到係咁。

蔡堅有心栽培玩過票？

事隔兩年，怪醫早前離開公立醫院醫生嘅行列，自立門戶掛牌行醫，可能無心戀戰，而就喺呢個時候傳出有人想染指下屆醫學界嘅席位。邊個？外間盛傳係近期喺公院聘請外來醫生風波中，突然冒起嘅「聯席香港醫療水平關注組」主席、前聯合醫院外科部部門主管郭寶賢。

有消息指出，雖然郭寶賢做過公院醫生，但無論喺公院或私家醫生嘅票源都好薄弱，若果出戰下屆醫學界選舉，勝出嘅機會好微，仲聽聞醫學會會長蔡堅有心栽培，諗住過票畀佢，等佢手瓜硬啲，同怪醫打過喎！

傳聞滿天飛，仲講到似層層咁。問過郭醫生係咪打算出戰下屆醫學界選舉，佢就話唔知點解會有人咁講，仲話自己未諗過喎！蔡堅亦話，呢啲嘢邊話過票就過到票㗎！況且依家距離改選仲有年幾時間，唔知仲有乜嘢人有興趣選。咁怪醫又點諗？係咪下屆唔會再落場競逐連任？佢就話依家一切言之尚早喎！

所有當事人各說各話，但空穴來風未必無因，時間可以證明一切。一來咁早講話參選，就會開始計選舉經費；二來聽聞醫學界依家着眼點喺選特首嘅選舉委員會，希望可以爭到更多選委會席位，有消息話，喺選委會選舉後，有乜嘢人會出戰下屆立法會醫學界選舉就會明朗化。