短打長擊：一味吹水 何曾施政

香港這塊福地淪落為「抗議之城」、「請願之都」，究其原因，是高官多不食人間煙火，煲呔曾說「香港沒有人無瓦遮頭」，「好打得」局長指劏房是部分基層市民想住在市區的「需要」，德成局長甚至睇唔到深水埗有劏房變做「棺材房」，總而言之，睇唔到就當無事發生！天是這麼藍，草是這麼綠，生活在香港，可以如此簡單和美麗，兩腳一伸，咁就一世！

香港之所以有咁多深層次矛盾，有咁多政治問題，有咁多民怨，好大一個原因，就係政府一味吹水，加上「起錨起錨」的狂呼，只有「動作」，何曾見「施政」？淨係派六千蚊都要擾民一番，八月廿八日起登記，九月仍是暑熱艷陽天，要長者扶住拐杖坐住輪椅去銀行登記，真係冇陰功！鬍鬚曾把派錢複雜化，不知管理為何物。

古人云，國之將興聽於民，國之將亡聽於神。夕陽政府之沉淪，將聽於高官，最新例子便是懂紅酒多過識政治嘅唐唐。話說唐唐日前走訪邊境學校，佢唔係針對近年跨境學童攀升問題而提出解決策略，而係大噴口水建議日後喺深圳起多幾間學校，等港人內地子女可以喺就近入學，唔使每日萬里長征喎！

嗱！呢啲就叫做九唔搭八喇，直情係電線短路！今趟唔係條條Fing，係Short Short哋！道理一字咁淺，正如咁多內地孕婦來港產子，就係覺得香港婦產科正，如果政府建議日後喺深圳起多幾間醫院，等內地孕婦唔使打崩個頭都要來港產子，咁嘅建議，肯定畀人插爆！唐唐明未？