話之你出路窄 副學士照加價

副學士被譏為掘頭進士，升學難，就業亦難，可以講係學無所用。但係咁，無用歸無用，學費一啲都唔平，仲幾乎年年加價添。呢，教育局資料顯示，四成二開辦副學士課程嘅院校，下學年將齊齊加學費，最高加幅達百分之五，跑贏通脹o架！

本來呢，如果讀完副學士課程後前程似錦，唔使憂出路，咁就算學費貴啲都物有所值吖。可惜事實啱啱相反，好多畢業生根本搵唔到適合自己嘅工作，有院校嘅副學士就業不足及失業率高達一成半，畢業變失業，都咪話唔徬徨。

講開又講，副學士就業難一啲都唔奇。眾所周知，副學士係董建華時代好大喜功嘅產物，被稱為「教育八萬五」，課程良莠不齊，認受性一向備受質疑。試諗吓，好多副學士課程依家仲未通過專業資格評審，畢業生又點可能咁易搵到工呀？最難堪嘅係，有啲公司寧願請中五、中七畢業生，都唔請副學士，你話係咪無奈吖！

唉，莘莘學子數年寒窗苦讀，捱貴學費不特止，仲要浪費青春，最慘係捱到畢業，竟然升學無門，就業困難，唔淒涼就假。其實，副學士課程搞到唔湯唔水，淪為教育「爛尾樓」，港府實在難辭其咎。當局當年大鑼大鼓推出副學士，話就話為升唔到大學嘅學生提供多一條出路，仲話要將本港青年接受專上教育嘅比率增加至六成添，點知港府眼高手低，志大才疏，推出副學士後就關人個關，所以咯喎，副學士課程一直自生自滅，有啲院校乘機博懵，濫開課程，飛擒大咬，學生任人魚肉，叫天不應，叫地不靈。

冇錯，港府近年的確推出唔少補鑊措施，希望為副學士洗底，例如推出檢討報告啦、設立質素保證機構啦、增加銜接學額啦等等，可惜雷聲大雨點小，最後唔係無功而退，就係虎頭蛇尾，掘頭進士依然係掘頭進士。老實講吖，如果最關鍵嘅認受性問題解決唔到，當局點樣補鑊、點樣洗底都係嘥氣喇！

計太一叮話齋，冇咁大個頭，就唔好戴咁大頂帽。人哋外國辦副學士課程辦到有聲有色，港府冇嗰樣整嗰樣，人辦佢又辦，結果變成東施效顰，自暴其醜。叮佢個鎯鎯吖，港府好大喜功唔緊要，最慘係誤人子弟呀！