政情：搞搞政：政府開綠燈益張炳上位

政府尋日宣布再度委任行政會議成員張炳良做消費者委員會主席，任期兩年，到二○一三年七月十二日為止。佢早喺○二年一月一日已出任消委會委員，即係前後做足十一年七個月零十二日，相信呢個紀錄都好難有人可以打破。

政府委任法定及諮詢機構成員係有「六六規定」，即係同一個人唔可以同時兼任六項公職、每項公職最多連續做六年，但如果某人任職同一個機構，而中途由普通委員轉做副主席或主席，甚至由正轉做副主席、正副主席轉做普通委員等，任期年限就可以重新計過。因此喺○七年七月起由消委會委員轉任主席嘅張炳，並冇違反有關規定。

張炳喺○二年初獲委任時，仲係白鴿黨成員，但自立門戶成立「新力量網絡」，喺○四年退黨，○七年仲做埋行會成員添，之後隨即獲升任為消委會主席。咁嘅政途走勢，一方面顯示政府「獨具慧眼」，睇準張炳遲早會脫離反對派行列，開晒綠燈畀佢上位，另方面亦證明撐政府真係有着數嘅，重要公職長做長有！