政情：馬雲攬實軟銀孫正義示好

支付寶控制權轉移一事，阿里巴巴兼母公司阿里集團主席馬雲嘅處理方式，被人指為未有充分照顧雅虎（Yahoo）同軟銀（Softbank）作為投資者嘅利益，有人猜測馬雲同軟銀主席孫正義嘅關係出現變化！不過，軟銀尋日嘅股東會，馬雲就以百分之九十九嘅得票率連任軟銀董事，馬孫關係轉差嘅傳言不攻自破！

孫正義又重申馬雲作為生意夥伴兼老友，彼此之間都非常信任對方，兩人更喺股東會中熱烈擁抱，驚死外界唔知佢哋心無芥蒂。

阿里嘅另一重要股東夥伴，雅虎尋日咁啱亦係開股東會，相對馬雲在軟銀股東會嘅支持，作為雅虎業務舵手嘅CEO巴茨（Carol Bartz）就難捱得多。雅虎無論係業績抑或股價表現，都令投資者失望，有股東更要求巴茨下台，好彩以主席波斯托克（Roy Bostock）為首嘅雅虎管理層仍然力挺巴茨嘅表現，佢暫時避過下台危機。