政情：派錢拒解畫 鬍鬚曾龜縮

財爺鬍鬚曾早排捲入涉嫌施壓風波，被前政府資訊科技總監葛輝指控欽點「上網學習支援計劃」嘅中標機構；政府當日使出陰招，專登安排喺立法會資訊科技及廣播事務委員會特別會議同日，公布向全港合資格人士派六千蚊嘅細節，結果成功將派錢變咗鬍鬚曾嘅遮醜布。鬍鬚曾表面過咗關，但立法會下星期一傾派錢安排，身為主事人嘅佢竟然龜縮缺席。

政府尋日向立法會秘書處提交出席財經事務委員會嘅官員名單，發現竟然係冇鬍鬚曾，成個財金團隊只得財經事務及庫務局局長「傻強」陳家強同常秘應耀康領軍。

原本有局長頂住都未必好大問題嘅，但大家唔好唔記得，年初泛民主派班議員趁住好多建制派議員返咗內地開會，突襲成功否決臨時撥款，當時代表政府主持大局嘅正正就係傻強喇，唔知佢今次會唔會再次腳頭無靈，又再出事呢？

好多人都以為，傾派錢啫，使乜咁緊張呀，班議員都唔會鬧㗎啦！如果咁諗就真係大錯特錯，因為自派錢方案細節公布後，唔少政黨同團體都認為，政府除要求市民登記先可以拎到錢外，亦應該考慮直接過錢畀嗰啲已經領取緊政府援助或津貼嘅市民，但政府至今仍無意讓步，令一眾關心弱勢社群嘅人士好憂心兼憤怒。

傻強淪擋箭牌

唔知係唔係因為咁，鬍鬚曾就選擇缺席會議，擺明係逃避面對議員嘅質詢，搵傻強嚟擋箭喇！

不過，財政司司長發言人確認鬍鬚曾唔會出席會議，理由係呢次會議只係講執行細節，司長一般唔需要出席咁話喎。

鬍鬚曾呢類高官接二連三逃避責任，睇嚟夕陽政府的確係時日無多，搞到個個都無心戀戰，與其係咁，倒不如提早捲蓆走人，倣效商務及經濟發展局咁叫個冇料到嘅人署任到底咪算囉，好過依家咁留低獻世吖！