濫做研究唔公開 自欺欺人鬧笑話

如果話，為官之道最緊要識瞞上欺下，有時甚至要呃埋自己，咁港產官僚都算係最佳模範嘞！

唔信嘅話，大家睇吓呢單荒謬嘢吖。過去三年，政府十二個決策局總共使咗兩億公帑，完成咗百幾項顧問研究。本來呢，決策前做研究無可厚非，荒誕之處在於，當中超過三成竟然從未公開或者對外完整披露。咁即係話，以公帑支付嘅研究報告，納稅人竟然無權過目一窺全豹，一直被蒙在鼓裏。

以最有「研究」精神嘅環境局為例，三年就用咗四千一百萬元，十五項研究中有五項只係作為政策參考，但係全部側側膊無完整公布。食衞局仲離譜，廿四項研究中多達八項只供內部使用，當中涉及控煙措施、醫療融資同豬流感疫苗成效等公眾議題，但竟然一律秘而不宣，同黑箱作業無乜分別。

只許高官研究，不准百姓過目，如果話唔係想蓄意隱瞞或者誤導市民，講都無人信。最搞笑嘅係，港府做完研究唔公開，最後呃埋自己人，鬧出大笑話。呢，港珠澳大橋環評報告敗訴之後，咪有高官大大聲話會有七十幾項政府工程受延誤嘅，原來呢個數字已經係十年前嘅陳皮舊資料。當中至少有五項工程完成研究後撤回或者取消，四項暫時毋須做環評，一項環評已經完成。即係話，呢十項工程根本唔會受官司影響，懵懂官僚擺咗烏龍都唔知，為自欺欺人做咗一次完美示範。叮！

雖則話，港府高官早就誠信破產，可信程度一向高極有限，之但係無理由連政府內部資料都搞錯o架嘛，真係笑大人個口。最驚仲係資料過時誤導決策，搞到香港更加一塌糊塗咋！

講到呢度，大家可能會問，政府嘅顧問報告有乜嘢咁唔見得光，點解要收收埋埋唔畀人睇呢？正如學者話齋，政府資訊唔公開，等同削弱市民嘅知情權同監察權。唔通真係被立法會議員講中，特登將研究結果收喺櫃桶底，第日有新政策出台，就揀啲有利數據出嚟護航，蒙騙公眾？若然真係嘅話，太一叮奉勸各位高官回頭是岸，咪再自欺欺人啦，唔該！

一句講晒，選擇性公布顧問結果形同黑箱作業，係極之唔要得嘅行為。計太一叮話齋，港府實在有必要進行多一項顧問研究，睇睇當局濫做研究，當中有幾多被刻意隱瞞收收埋埋，有幾多連高官都被呃埋，又有幾多做完等如冇做，將納稅人血汗錢揼咗落鹹水海。不過，記得公布研究結果呀，叮！