政情：搞搞政：大輝撐中小企 狂插傻強署男

夕陽政府班高官開始以「少做少錯」嘅心態企圖hea過，林大輝尋日喺立法會動議辯論保障中小企經營同發展空間時，首先向財經事務及庫務局局長「傻強」陳家強發炮，狠批傻強面對過時、有問題嘅稅務條例39E，依然麻木不仁唔願意作出修改，繼續抱住「少做少錯，唔做冇錯」嘅官僚心態處理事件。

大輝仲忍唔住直斥傻強其實係好偽善嘅官員，成日口口聲聲話好鍾意聽工商、會計同稅務專家嘅意見，實際上佢連稅務聯絡小組嘅意見乜都唔聽，閉門造車，充滿官員霸權思維，漠視中小企生死。

跟住佢又辣埋繼續做「署男」嘅署理商務及經濟發展局局長蘇錦樑，話競爭法係中小企頭上嘅虎頭鍘，令佢哋人頭落地，而對方又成日唔嚟開會，仲質疑對方識唔識解釋條例畀佢哋聽，有關條例只會對中小企造成更多白色恐怖咁話。鬧到爆，若果有虎頭鍘喺度嘅話，睇嚟大輝想鍘咗傻強同蘇錦樑喎！