政情：曼聯總監避談上市
曼聯盛傳即將嚟香港上市，其商務總監艾利昌尋日同本港傳媒見面，諗住佢會講吓上市大計，點知撲咗場空，原來曼聯最想講嘅係「一個成功品牌是如何打造」嘅哲理。
曼聯係全球最具商業價值嘅球會就「係人都知」，而艾利昌話佢哋全球嘅粉絲數目超過三億人。三億人就咁聽好似唔夠震撼，但換個角度講，三億人支持同一間球會係乜嘢概念，即係全美國嘅市民，全部只支持一隊足球隊，分別係美國有四大聯賽、每個聯賽仲有二十幾、三十支球隊。
其實曼聯喺搞品牌方面確係有一手，佢哋好強調歸屬感，會推出好多適合當地球迷嘅本土推廣計劃，畀球迷有同球會共同經歷嘅體驗。所以曾經有調查反映，一個商業品牌與曼聯合作後，以曼聯品牌推廣產品嘅吸引力，竟然比用自己品牌嘅推廣高出近三倍㗎！
艾利昌尋日同本港傳媒見面，但冇講曼聯上市大計。