「榨乾丈夫身家」揭鋒芝變序幕

【本報訊】自謝霆鋒及張栢芝傳出婚變開始，兩個家族明顯分成兩大陣營，拉姑、謝婷婷一直支持霆鋒，謝賢本來力挺新抱栢芝，最近轉軚改撐乖仔；至於栢芝家人則一直保持低調，採取封嘴態度。

其實，事發初期查小欣在電台節目內大爆鋒芝婚變內幕，指栢芝「榨乾丈夫身家」，連霆鋒送給謝賢的千萬豪宅亦不放過，傳出是狄波拉（拉姑）授權她爆料，謝賢就此扯火，怒轟查小欣多事，鋒芝婚變傳聞亦正式揭開序幕。

四哥棄撐「謝家之光」

但拉姑日前露面時只透露沒有見兩名孫仔的機會，而一直大讚栢芝是「謝家之光」的謝賢亦轉軚表示：「佢以前好好㗎！」未有如以前般出言力撐栢芝，只向外表示他也不知兩個孫仔的行蹤。而剛專程飛吉隆坡探班兼開解霆鋒的婷婷，只透露霆鋒心情未有異樣：「都係日日打機，唔係要發洩，因為佢由細到大都鍾意打機。我哋冇特別傾阿嫂嘅嘢，反而話題都係關於打機。」但就承認兩個月沒見過兩名姪仔。

至於張家則一直三緘其口，栢芝兩名弟弟張豪龍及張栢文出席公開活動時，表明不會談家庭事，栢文甚至火速走進場內避開記者。而栢芝母親亦已於日前離港，她只在事後接受本報記者訪問時承認身處加拿大，被問及是否在當地湊兩名外孫時，只說：「我唔講喇！（兩個孫依家點？）唔講喇！（栢芝情況點？）我依家要處理一啲事，唔講住，等我返嚟先講。（你幾時返？）未決定。」直至前晚，栢芝偕同弟弟張豪龍、經理人Emily、助手及化妝師一行五人出現機場，由十二名保安築成人牆護航，記者大聲追問栢芝：「是否和謝霆鋒離婚？」她笑而不答，掩嘴直入禁區。