否決加價不治本 回購東隧莫遲疑

行政會議尋日否決東隧加價四成嘅申請，當局話喎，政府十分關注市民對於東隧加價嘅負擔能力，鑑於新隧公司財政狀況穩健，到舊年年底為止，已累積盈利超過五十億港元，所以政府認為冇足夠理據支持加價申請。

話時話，東隧實在太無良，賺到盆滿缽滿，仲人心不足蛇吞象，年年加價，今次仲要加四十個巴仙，簡直係撳住嚟搶。家陣加風四起，港鐵加、小輪加、的士加、巴士加、電車又話要加，政府統計處公布五月份消費物價指數，比舊年同期增長咗五點二巴仙咁多。如果東隧大幅加價，就會令加風愈吹愈勁，市民更加冇啖好食。

行政會議否決東隧嘅加價申請，煞住加風實在係順應民意。近年各種交通工具申請加價，無論點飛擒大咬，政府從未托過手（月爭），點解唯獨東隧今次申請加價，政府又夠膽否決嘅？一字咁淺，政府否決加價申請，只不過係擺姿態，詐諦「為民請命」。其實呢場大龍鳳只做咗上半場，下半場先至係戲肉。

事關新隧公司擁有東隧專營權，白紙黑字寫到明，利潤回報容許達到十五巴仙，達唔到就可以申請加價，若果政府唔批准，佢哋就要求仲裁，始終有得加。有先例㗎，東隧喺一九九七年同二○○二年兩次申請加價被否决後，都要求仲裁，兩次都勝訴，第二次仲獲准加價七成添。今次如果東隧再要求仲裁，唔使問阿桂都贏梗。

講到尾，最慘嘅係市民，直情係砧板上嘅肉，任宰任割。冇得傾啦，鬼叫香港人時運低，碰到個弱勢政府咩。

不過，都唔係無計可施嘅。嗱，東隧也文也武，都係恃住有專營權啫，將專營權收番咪一天都光晒囉。社會各界一早就呼籲政府回購東隧，但係政府打死都唔肯出手。係咪冇錢呀？梗唔係啦，庫房滿到瀉，買十條東隧都唔成問題。

問題係，班高官不嬲懶到出汁，少件事好過多件事。加上本屆政府已時日無多，人人等收工，翹埋雙手唔做嘢，仲話回購唔係唔好，但要等到專營權屆滿時才考慮。大佬，專營權到二○一六年先至屆滿，等得嚟，蛇都死，蚊都瞓啦。

一句講晒，否決加價只可以治標，回購東隧先至係治本之道。講多無謂，食多會滯，唔該各位官老爺臨收工做番件好事益吓市民啦。叮佢個鎯鎯！