政情：搞搞政：發叔忙為鄉局新址撲水

新界鄉議局嘅沙田石門新局址已經落成，仲密鑼緊鼓搞開幕禮添，不過，主席劉皇發除咗忙呢度，仲要煩撲水。事關鄉議局中人透露，局方早前以暗標方式為九龍塘舊局址搵買家，最終都冇人落標，搞到依家要改為正式公開招標出售。舊址賣出，至有資金回籠，睇怕發叔有排頭痕！

鄉議局新局址尚餘幾千萬元工程費未埋尾，近期都要四圍撲水，好彩最後有一名已退休嘅鄉議局資深議員出面同某銀行聯絡，獲銀行同意向該資深議員透支唔超過五千萬元畀鄉議局應急，但條件係收取年利息兩厘。

點解銀行會咁順攤借錢畀嗰名資深議員呢？據聞係以鄉議局主席發叔為首嘅三巨頭要作出擔保，當然該資深議員亦都要孭飛，用私人資產作為擔保。鄉議局初步決定喺短期內以公開招標方式再次出售舊局址，如果有人認頭，就可以陸續還錢畀該資深議員，發叔嘅撲水任務都可以告一段落。