政情:王石嘆紐約樓平過京滬

內地樓價飆升,價格貴到連內地知名發展商都話「不得了」。內地最大房企之一嘅萬科董事長王石雖然年屆六十歲,仍定下留學美國三年嘅目標,眨吓眼已經做咗半年留學生。《紐約時報》連續第二年主辦嘅「紐約論壇」,今年因為中國熱,特設咗一個中國專場討論,題目係「中國模式」,王石應邀做嘉賓。

佢話,呢半年喺哈佛讀書,親身比較過中、美兩地房價同房屋質量,唔比較猶自可,一比較就不得了!「情不自禁想喺紐約投資買房子,比起喺北京、上海買房子都便宜。」佢仲話,中國有啲大城市嘅房價太高,好難持續落去,一旦房地產泡沫破滅,影響將會好大。

瑞信星級分析員陶冬早兩日都講過類似嘅說話,話有個朋友喺佛羅里達州以十五萬美元買咗幅地,夠起四幢獨立屋,但相同價錢只可以喺上海買個廁所,又或者喺海南島買兩個廁所。

「Money18免費即秒股票報價網站」現推出8升級功能,財經資訊,實時實發!

正喺哈佛留學嘅萬科董事長王石話,喺紐約買屋遠比北京、上海平。(資料圖片)