美容毒針網上賣　港府把關太失敗

貪靚係女人天性，「愛靚唔愛命」更加係好多港女嘅扮靚教條，女士們嗰份孜孜不倦追求駐顏之術嘅毅力同冒險精神，實在令人敬佩。之但係咁，喺香港試用美容產品真係要好小心，一個唔好彩，求靚夢碎不特止，仲分分鐘搞出人命。

嗱嗱嗱，太一叮唔係危言聳聽。近年唔少愛美少女為咗塑造夢寐以求嘅間尺鼻、V形面，興起上網購買美容針，自己喺屋企進行面部修葺工程，原來好鬼牙煙㗎，仲揭發當局對網上美容商品嘅監管存在好大漏洞添。

事情係咁嘅，最近內地有購物網站銷售多款溶脂針同美容針，聲稱可以瘦身、瘦面、隆鼻、隆下巴同去皺紋，最平人民幣五十蚊有交易。乜注射式美容技術唔係要經醫生或者專業技師操刀嘅咩？幾時變成自行網購、自行啪針咁自助式？於是乎，本報記者買咗其中四款溶脂針同一款美容針，睇吓究竟係乜東東芫荽葱啦。一睇之下，發現情況相當離譜，全部成分不清，產地不明，連針劑名稱同證書都無，質素同安全性可以話係毫無保障。

聲稱可以一圓千百年來女性貪靚美夢嘅新技術竟然產品資料全部欠奉，情況同女明星經歷身體再發育奇迹一樣，所謂美容功效，極有理由令人懷疑係弄虛作假。

買錯假嘢打錯針，無功效最多嘥錢啫，最驚係唔知打咗啲乜嘢入身體，貪靚不成反害命。記者發現，五種針劑其中一種竟然含有美容業「禁藥」卵磷脂！據專家所指，卵磷脂嘅醫學用途主要係醫治血管栓塞，唔單止未經臨床數據證實具有美容功效，胡亂使用更加會出現好多副作用，可以導致腎、肝衰竭甚至死亡，美國、英國同巴西等國已經禁止美容業使用。

所謂黃蜂尾後針，最毒婦人心，不過睇嚟點毒都毒唔過呢支卵磷脂針。不法之徒利用互聯網缺口，當香港係無掩雞籠咁將毒針長驅直入銷售，好明顯港府就係把關粗疏啦。喂，記者輕易喺網上買到毒針，表示一般市民亦有機會誤墮陷阱，如果女為悅己者容變成女為悅己者肝腎衰竭，咁就大件事。

醫學界人士警告，自行以針劑注射面部可致局部組織壞死，嚴重就會永久歪嘴。雖則話港府難以規管境外網站，但起碼要加強宣傳，衞生署一旦發現呢類不良產品喺本港出售，更加要即時檢控。其實，把關官僚都有女性家庭成員㗎，為人為己都係盡快堵塞毒針漏洞啦，斷估你哋都唔想屋企嘅姨媽姑姐中招啩？叮！