政情：搞搞政：IT豪孤身走上成功路

當年二十五歲創業、未夠三十歲就做咗上市公司主席嘅立法會資訊科技界議員「IT豪」譚偉豪，日前出席論壇分享成功之道時，直言做CEO其實好寂寞，好彩佢喺大學生活習慣咗一個人「孤身走我路」，令佢投入呢個角色喎。

IT豪自爆喺讀大學嘅四年裏面，每日都風雨不改由馬料水行返中大校園，堅持唔坐校巴。佢笑言一來係因為佢讀嘅電子系得一個女生，拍拖無望，二來亦因為佢好享受一個人生活，仲話每朝獨自上路時，都會覺得自己好有傲骨同好偉大，亦令佢成功克服寂寞喎！

佢生產嘅「快譯通辭典機」長賣長有，原來「啟蒙之地」就係鴨寮街。事關喺佢讀高中時，哥哥喺鴨寮街買咗第一部蘋果電腦返嚟，從此令佢愛上電腦，更激發佢努力讀書。雖然快譯通大賣數年後即被其他公司抄橋，推出相類產品搶客，但佢就好睇得開，話如果唔係有呢個競爭對手，相信「快譯通」唔會進步得咁快。