政情：陳晴生日公幹兼湊仔

做咗全職媽媽，Judy陳晴仍然身兼幾職，前幾日佢就以香港海洋公園保育基金主席身份，同傳媒簡布保育工作，話今個年度收到一百零八份研究申請，基金將會撥近五百萬元資助四十一個亞洲保育項目，涉及十個國家、二十七種受威脅物種。除咗香港，佢哋亦有幫手為四川、陝西、甘肅等地嘅熊貓種竹，有次仲為該地一次過種咗十六萬棵，可惜當時Judy行唔開冇去，佢話下次一定要帶埋囝囝出發。

Judy囝囝只得六個月大，但已經可以陪媽媽出差嘞。Judy另一個主席身份係聯合國兒童基金香港委員會主席，上個月佢生日撞正母親節，所以帶埋囝囝去瑞士開大會，咁啱嗰次係二十五年嚟香港首次獲獎，成為各地嘅籌款冠軍，於是個個都讚佢囝囝好腳頭。Judy又話，最近有一個慈善機構無論名字、用色同標記樣樣都同佢哋好似，基金會已經交咗畀律師處理，佢好贊成法改委建議對慈善團體進行監管，畀捐贈者有個信心。