政情：邱騰華瓣瓣衰扮有胸襟
「掂乜衰乜」嘅環境局局長邱騰華尋日接受電台訪問時話，早年喺地區處理民政工作時，已明白推行政策要聆聽市民民意、中間着墨，仲話做咗政務官咁耐，好明白「政策唔等人」嘅道理。
不過，唔好忘記上年五月政府計劃以「先訂立，後審議」嘅形式，喺缺乏民意基礎下計劃佔用郊野公園擴建將軍澳堆填區時，遭立法會反對兼廢令，將行政立法關係變冰點，最後迫使政府放棄原先計劃，極為面懵；另外佢亦喺全城圍剿下，決定就停車熄匙草案提出多項豁免，變相將新例「剝光豬」。
佢喺電台節目上仲死撐自己推出嘅政策惹爭議係「正常不過」嘅事。被問及慳電膽醜聞時，佢話呢個係「過渡咗嘅問題」，又話事實會證明一切，「從政者必須有此胸襟」喎。若果佢真係肯聽多啲民意，就唔會有咁多瘀事醜事啦！
