政情：黎棟國在港初嘗弄孫樂
父親節唔只做爸爸嘅開心，做爺爺嘅同樣甜在心頭。保安局副局長黎棟國嘅細仔喺幾年前已三年抱兩，奈何佢哋一家長居澳洲，黎Sir只能喺網上越洋同孫仔玩同埋用iPad睇孫仔嘅相「止渴」。不過，今年佢居於香港嘅大仔為佢添多一個孫女，令佢可以喺香港一嘗湊孫之樂。
黎Sir話孫女喺五月六日嘅三時三十三分出世，有三三不盡嘅寓意，相當好意頭，佢仲大讚孫女眼仔睩睩，好趣致。佢笑言自從孫女出世後，太太同佢玩得不亦樂乎，而佢每日放工後都歸心似箭，仲搞到應接不暇喎。
雖然注意力被分散，但遠在澳洲嘅兩名孫仔亦相當識做，專誠拍咗條短片祝爺爺父親節快樂，仲upload埋上YouTube，個個睇完片都大讚佢哋得意。難怪尋日打畀黎Sir時，佢都難掩喜悅，甜絲絲咁話今年父親節特別開心啦。
黎棟國畀呢個孫女搞到暈晒浪。 （黎棟國提供）