政情：肥仔明出醜划浴缸反艇

尋日嘅今年龍舟嘉年華搞咗個名人划浴缸比賽，落場嘅立法會議員「肥仔明」李華明一開始好風騷咁同岸邊睇比賽嘅市民揮手，但可惜出師不利，比賽開始唔夠半分鐘，佢個浴缸就反轉咗，同拍檔雙雙跌落水，要由隔籬嘅工作人員救番上嚟。佢上岸接受訪問時仲死頂話自己未試過喺維港游水，所以今次嘅感覺都幾特別喎，但佢都承認有少少唔開心，未划過就反咗，覺得有啲唔抵。

另一立會議員Tanya陳淑莊嗰隊划吓划吓竟然划咗去人哋條賽道度，但最後都攞咗個尾三。佢話一啲都唔介意排尾三，因為佢同助手嘅目標都只係唔好反艇。咁之前有冇練習過呀？佢話同助手只係試過喺辦公室將兩張櫈放埋一齊，再用長遮划吓划吓就當練習咗喎。